انفعل المحامي خالد أبوبكر، بسبب حالة الغليان التي تمكنت من الشارع المصري بعد الحكم ببراءة الرئيس الأسبق حسني مبارك وحبيب العادلي و6 من كبار مساعديه من تهم قتل متظاهري 28 يناير، قائلًا: «آه قانون وعدل بس أنا مش ناسي، كان فيه أنصاف رجال في كل حتة في البلد، ومبارك كان داخل لحد دار القضاء العالي بكل جوانبه، إحنا هنستعبط على بعض، مش ممكن تمحو أخطاء من وجدان الناس».
أخبار متعلقة
وأضاف «أبوبكر»، خلال برنامجه «القاهرة اليوم»، على فضائية «اليوم»، مساء الأحد: «مصر كانت في فساد تام في آخر سنوات في عهد مبارك، ماعرفناش نثبت لأننا كنا قليلي الحيلة، إحنا هنضحك على بعض علشان نجمل الصورة، المدعي العام ماحركش دعاوى الفساد ليه لما مبارك كان موجود، وجاي دلوقتي تقولي ابنك مات واتسرقت بس اثبت، طب إزاي.. أروح أجيب مخابرات وجهاز أمن دولة على حسابي؟».
وتابع: «نروح فين ونعرف منين، مطلوب منك دلوقتي أنك تستحمل وتسمع تريقة وناس بتهلل وبتزغرط وأنت لسه ليك أخ ميت وناس بتولع في بعضها، اللي نزلوا 25 يناير رجالة ومش ذنبهم اللي حصل بعد كده، نزلوا خسروا عنيهم علشان يكسروا حاجز الخوف اللي مش هيرجع أبدًا».
واستكمل «أبوبكر»: «كل الناس لازم تفهم إحنا وافقنا على دستور ينص على ثورة 25 يناير، اللي عاجبه عاجبه واللي مش عاجبه يتفلق، اللي وقع نظام حكم كان يعتمد على فرد، وقع وبلا رجعة ومش هينفع نطاطي تاني».
