مش عارف ليه وأنا باتفرَّج ع التليفزيـون.. وبتيجى النشرة بألاقى وشى راح كده 100 لـون.. السورى بيضرب فى السورى واليمنى بيضرب فى اليمنى.. وعراقى بيضرب فى عراقى، والمصرى بيضرب فى المصرى.. والليبى أخويا وحبيبى دا بيضرب برضه أخـوه الليبى.. والكل بيهتف ويكبَّر قتلت أخـويا الله أكبر!.. رفعـــــولى الضغط مع السكر وبأحس بجسمى كده متكسَّر.. ولا حدش فيهم بيدوَّر على ابنى وابنــه ولا فكَّر.. راح ياكلــوا منين لو تتبوَّر الأرض الخضرا وتتصحَّر.. وسلاح الغرب المتطوَّر هيروح على فيـن لو نتنوَّر!.. وادينا بنكتب ونسطَّر وأملنا فى يوم كده نتحــرر.. م الجاهل العربى اللى مفكَّر بعد ما هيحرق ويدمَّـر.. الوطن العربى المتزرزر أمريكا هتقــوله الله ينوَّر.. وتعالج ابنه المتعوَّر وفى حضن أوبـاما هيتصوَّر!!
عثمان بحور- الإسكندرية
