أبويا الحبيب.. يا أقرب قريب.. اوعى دموعك تغلب صمودك، أنا وارث شجاعتك، وحبك لبلدك.. وفاكر حكايتك يوم العبور، وروحك فى كفك، وعزمك ونصرك لبلدنا سلامة.. أنا ثورتى وحبى لبلدى لأجل الكرامة.. أبويا وحبيبى.. أنا كان نصيبى أتلف فى علم رفعته أنت قبلى، وبصمته بدم.. وهدفك وهدفى واحد فى هم مصر الحبيبة.
أبويا الحبيب.. رصاصة العدا لفت وجاتلى. وكانت بقتلى جواز المرور، لجنة ونور، ومنحى الشهادة، ولبلدى السيادة.. تعيشى يا مصر.
كمال نجيب
