واحنا زمان ف المدرسة.. كانت التخت جنب التخت.. نقعد ولاد جنب البنات.. وكلام مابنا خد وهات.. أحلام بسيطة من ورق، ونقطعه يوم التلات.. إدينى يله المسطرة هرسم طريقى المستقيم.. ف عنيها يتنطط فرح، وتشد منى صفحتى، وتحط دايرة ف وسطها، وترسم عنين، وتقوللى لونهم بقى، وأكتب لها.. فين الشفايف والخدود؟، حط النقط فوق الحروف لحسن كلامك تهتهة.. تضحك عنيها بقهقهة.. تنزل دموع من كتر ضحكة قلبها.. وأرسم لها ديل الحصان زى ما هفهف شعرها.. تاخد القلم وترسم دواير ع الورق.. شايف الحلق؟.. سبحانه صور وخلق.. يضرب جرس وف ثانية فى أرض الطابور.. نجرى ونلعب فى الهوا زى الطيور.. دلوقت دنيا اتغيرت وبنينا سور.. تطلع بناتنا معقدة وولاد تدور.. تمشى الشوارع لفلفة مش شايفة نور.. فينه الطريق المستقيم؟؟
سامح لطف الله
