أجرى الدكتور محمد حسين، تجربة «تنويم مغناطيسي» لأحد أعضاء طاقم قناة الحياة على الهواء مباشرة، بحضور الإعلامي عمرو الليثي، مقدم برنامج «بوضوح».
وجاءت التجربة بطلب من عمرو الليثي من الدكتور (محمد)، الذي حذر المشاهدين من القيام بذلك لأنه طريقته تعتمد على «تفاصيل علمية».
وأخذ «الدكتور» يقول لعضو طاقم الحياة الذي جلس أمامه على كرسي: «غمض عينيك، اقعد هادي، خد نفس وطلعه في أطول فترة ممكنة، ممتاز تاني، رائع، تاني، مع كل نفس بيخرج عاوزك تحس إن التوتر اللى جوالك بيخرج، رائع، ارخى جسدك مع كل نفس هتحس إن الاسترخاء بينزل في جسمك دلوقت، هتلاقي الاسترخاء نازل على أكتافك، هينزل دلوقت أكتر، وهتحس إن جسمك بيتقل ع الكرسي وكأنك مش عاوز تحركه، الاسترخاء هيوصل لأيدك ومش هتقدر تحركها تاني».
وأضاف: «هتحس إن أيدك بتتقل أكتر وأكتر وبتثبت أكتر وأكتر، جسمك بقى تقيل جدًا على الكرسي، عاوزك تسيبنا وتسرح بخيالك لتجربة كنت فيها مبسوط ومتستمع، روح للتجربة دي شوفها من فوق تفتكر كنت فيها عامل أزاى، مع كل نفس بيخرج بتعيش الحاجة أكتر وأكتر، مشاعرك بتخش جواك دلوقت وبتتحرك في جسمك، هتجيب معاها طاقة.. المشاعر دي هاتها وتعالا المرة دي هتحس إنك خفيف.. فتح عينيك لما أعد من واحد لتلاتة».
