السيسي عن أزمة الكهرباء: «فيه ناس عاوزة الشعب يغضب»

طالب الرئيس عبدالفتاح السيسي المصريين بالصبر على أزمة انقطاع الكهرباء المتكرر، مُضيفًا «المصريين محتاجين يقفوا ويصبروا ويجاهدوا، من فضلكم اصبروا ولازم تكونوا واثقين إننا هنتغلب على ده، لكن مش هنتغلب عليه في شهر ولا اتنين أو 3».

وأضاف السيسي في كلمة وجهها للأمة، ظهر السبت: «فيه ناس عاوزة تعرقل حل المشاكل عشان الشعب يتأثر ويكون غضبان ومستاء وزعلان، إحنا بنواجه حاجات كتير، إحنا بنحارب معركة وجود بدأت من سنين طويلة فاتت لهدم البلد، ودلوقت بنحاول نوقفها ونرجعها تاني، بس إوعوا تتصوروا إن ده سهل، لكن هياخد وقت وجهد».

وتابع: «أقبل رد الفعل من الناس، لما يكون حد في بيته أكل ويتلف أنا بعذره، بس عاوز أقوله ده أمر لازم كلنا نصبر عليه، لا ندير الأزمة بشكل الجيد، وممكن نؤذي نفسنا، تتكلمون عن أمر لم تتم مجابهته من سنين».

واعتبر أن المصريين يحتاجون إلى الصبر لعبور الأزمة والقائمين على الكهرباء «يكونوا أمناء وعندهم الجرأة ليعملوا بمنتهى القوة والفعالية ولا يترددون في اتخاذ القرار المناسب لمواجهة المشاكل.. عندنا مشاكل كتير ومكانتش مستخبية، وقولنا هنعالجها مع بعض».

وانتقد السيسي تغطية الإعلام لأزمة الكهرباء، قائلًا: «لما ألاقي في الجرنال عنوان (الحكومة منورة)، تعامل الإعلام مع الأزمات لا يتم بأسلوب تاريخ المشاكل».

وأضاف: «قلت لا يمكن أتكلم من كلام مكتوب، قولت مش هتكلم كلام مترتب لكن هتكلم من واقع المسؤولية والأمانة اللى أنتم حملتوني بيها».