قدم الرئيس عبدالفتاح السيسي، الأحد، العزاء إلى أسر شهداء القوات المسلحة، الذين سقطوا في كمين الفرافرة بمحافظة الوادي الجديد، السبت، قائلًا: «والله يا ريتني كنت أنا».
أخبار متعلقة
ورد عدد من أسر الشهداء على السيسي، قائلين: «كلنا فداك يا ريس».
وقال السيسي: «اوعوا تفتكروا إن اللي بيحصل ده هيبقى أول وآخر مرة، لا دي معركة كبيرة».
وأضاف: «كان قدامنا خيارين يا الناس تموّت بعضها، يا الجيش يخش يموت، فاخترنا إيه.. أه هما ولادكم وولادي وولادنا كلنا وخلوا بالكم اللي مات واستشهد مش ابنك أنت بس، ده ابننا كلنا وابن كل المصريين، وراح فدا كل المصريين، وراح عند ربنا اللي مابتضيعش عنده حاجة».
وتابع: «لكن المجرمين مش هنسيبهم»، مضيفًا: «دي أول مرة مصر بتستهدف كده، وعايز أقول لكم على حاجة تبرد ناركم ونارنا، اوعوا تفتكروا إنكم اللي مهمومين وزعلانين، والله أنتم زعلانين وإحنا زعلانين وأنتم مهمومين وإحنا مهمومين، لكن بصوا حوالين منكم كويس وأنتم تعرفوا إيه اللي كان ممكن يتعمل عندنا، وربنا نجانا منه».
ومضى قائلًا: «أنا بعزيكم وبعزي كل مصري وأقول له ده اللي استشهد فدانا كلنا، وكمان دمه في رقبتنا، وأنا مش بنسى وأنتم كمان مش هتنسوا، والجيش والشرطة مش هينسوا لإن إحنا عايزين الخير والإصلاح».
وشدد: «عايزين نشوف بلدنا كويسة، وعايزين الناس تعيش في أمان، إنما هما عايزين إيه، بصوا حوالين منكم وأنتم تعرفوا، ودي أكبر أزمة بتمر بالمنطقة بالكامل».
واختتم: «يعز عليا دموعك يعني، وتصدق وتؤمن بإيه، يا ريتني كنت أنا، والله يا ريتني كنت أنا، ولا أقف قدامكم كده.. وفيه لجنة مشكلة عشان تراجع اللي حصل».
وتعالت أصوات الحاضرين من أسر الشهداء: «كلنا فداك يا ريس، والشهداء هيناموا مرتاحين لما الكل يدور على حقهم».
