حذر فذر موش بنهذر.. دى الفزورة بشكل جديد.. الحلقات موجودة معانا من دلوقت لبعد العيد.. ما هي موجودة عندى وعندك بيها مصابيح البيت بتقيد.. ضاعت منى وضاعت منك، وكمان ضاعت م العواميد.. ف المطبخ عملوها شرايح، والفواتير دايماً بتزيد.. وأما سألنا عن الأسباب قالوا الضغط عليها شديد.. وإن مادفعتش نفصل عنك، وراح نطالبك بالتسديد.. تيجى تتظلم أو تتكلم كل كلامك موش ح يفيد.. بتجيلك م السد العالى، أو تتولد ف محطات.. عبر عمود الضغط العالى، وبتتسجل ف القراءات.. والعداد ح يقول استهلك، وح تتحاسب بالكيلو وات.. وراح تلاقى محصل جاى لك، ح يقول طلع يلا وهات.. تقطع عنك غصب عنك، وأنت ماتقدر تعمل حاجة.. وقتها حالك راح يتعطل، وح تتضرر م التلاجة.. وح تتنرفذ وراح تزعق، والمسألة ماهش محتاجة.. لكن تفرح لما تعودلك، وح تحلو وتبقى ألاجة!
مهندس زراعى أحمد محمد زايد- مكافحة الآفات وزارة الزراعة
