غلبان وشقيان وطمعان فى حبة فول.. مش بالضرورة لمون أو بطحينة معمول.. ومش بالضرورة يكون متبل على أصول.. ترضينى حبة ملح ورغيف أسمر.. وتكفينى فى الشاى خمسينة ونص معلقة سكر.. وبلاها شيشة.. هنصرف ع الكيف واللا ع العيشة.. دانا حتى عشان أشترى غويشة.. وأعمل شبكة فى المعقول!.. بس المشكلة فيا أنا، عندى نية بس ماعنديش جزمة !.. ناس قالولى هاتها مستعمل !.. وناس قالوا مالهاش لازمة!.. يعنى أروح الفرح حافى، واللا أشحت من الاسكافى، وأرجعها بعد الفرح علطول؟.. لكن على إيه شبكة وربطة وربكة.. الأول أشوف السكن.. لفيت فى أرجاء الوطن.. أتارينى باحلم حلم بايخ.. أو إنى دايخ.. أو إن ده مش زمنى.. أو يمكن لأنى...! حلمى طمعنى فى حبة فول.. بقى ده معقول؟!
جمال رمضان - الغردقة
