يا اللى انتى أصل الحكاية
والعشق..
والفرح..
والأغانى..
يا اللى عشانك
كان يهون الدم
ويرخص كل غالى..
اسمعى..
لقد جاءنا البيان التالى
كل الليالى تشبهك يا حزن
بتعليمات م الباب العالى
تم تحرير الرصيف
من كل أعداء الوطن
وتم السيطرة..
على كل النقط الحصينة..
وتم رفع العلم
على دكان العصير
فى أكبر ميدان فى المدينة..
مفيش فى الشارع
غير بقايا جراح
وكام دمعة حزينة..
وجارى التعامل معاهم
بكل أسلحة الإهانة..
أفقدنا المواطن توازنه
لا بقى عارف اسم الدوا
ولا عارف فين الأجزخانة..
وزرعنا الخوف والقلق
فى قلوب الناس..
وسحبنا رخص
أكتر من سبعين ميكروباص..
ظبطناهم بيجروا ورا لقمة العيش
مبروك عليكى يا حكومة
الأمن..
والاستقرار..
مبروك عليكى الانتصار..
مبروك عليكى الرصيف
واحتلال الشارع..
والمدينة..
مبروك عليكى اعتقال
أجمل وأشرف ما فينا..
ولاد مصر
من ذوى الاحتياجات الخاصة..!
