بحلم أكون مواطن ليا حقوق وعليا كمان واجبات.. بحلم على الأقل أملك في جيبى تمن تلات وجبات.. وأسكن شقة ليها سقف وأستر الولاد والبنات.. وترخص الأسعار قبل الموظفين مايصرفوا العلاوات.. وسعر السلع في السوبر ماركت يكون بسعر الجمعيات.. وفى قسم الشرطة أتعامل كإنسان من غير إهانات..
وأكتب وأعارض بحرية ولا أدخل يوم معتقلات.. والشوارع تبقى نضيفة وموجود فيها سلة للمهملات.. والمدرس يشرح في الفصل زى مابيشرح في المجموعات.. وأروح شغلى بسهولة وألاقى كرسى في الأتوبيسات.. ولما أتفرج على برنامج ماكرهش نفسى من كتر الإعلانات.. ولما أكون مغترب ألاقى اسمى في كشوف الانتخابات.. ولما أطلع على المعاش أكون قادر على مواجهة الأزمات.. ممكن ده يحصل؟.. وألا يبقى كابوس وألا تهيؤات!
سليم نقولا- القاهرة الجديدة
