أنا جبت لبنتى طقم حراسة وعلمتها بوكس وكاراتيه.. وخليتها تروح الجيم ورخّصتلها «آر. بى. جيه»!.. بس يا ريته يكون نافع.. دى الحكاية محتاجة مدافع.. من كتر اللى سمعنا عليها.. دى البلاوى أشكال وألوان.. التحرش فى كل مكان.. ومحدش بيسيب حد فى حاله، ربنا يستر عالنسوان!!..
بس هو أنا بالنسبالى غلطان.. علشان خلفتى مفيهاش صبيان؟.. أهو دلوقتى أنا الخسران!!.. بس الندم عمره ما هيفيد.. نزلت وراحت السيما فى العيد..
دلوقتى راقدة فى الإنعاش، وعملنا لباقى صحابها صوان.
طب هعمل إيه أنا دلوقتى؟ هفضل طول عمرى تعيس؟.. مش معقول هسكت على حقى، أنا لازم أبلغ البوليس.. قبل ما بنتى تفكر مره وتعملها، وتنزل تركب أتوبيس!.. المسألة مش عايزة هزار.. التحرش بـأه ليل ونهار.. مش فارقه واحده لابسه مايوه، أو حتى واحده لبسه خمار.. دى عنيك ماتشوف إلا النور.. لو شفت واحده واقفه فى طابور.. وعالعموم ربنا ستّار!!
عمر غيث
