نفى كريم حسين، أدمن صفحة «أنا آسف يا ريس» على «فيس بوك»، أن الرئيس الأسبق محمد حسني مبارك «انكسر أو بكى» أثناء نظر جلسة قضية قتل المتظاهرين والفساد المالي، السبت، قائلًا: «مش حسني مبارك اللي ينكسر أو يبكي».
أخبار متعلقة
وقال «حسين»، في مداخلة هاتفية على قناة «صدى البلد»، مساء السبت، مع الإعلامية رولا خرسا: «كل الجرائد والصحف خرجت علينا النهارده بتقول مبارك بكى، مبارك عيّط، كأنهم بقالهم 33 سنة نفسهم يشوفوا الراجل ده في لحظة انكسار ولحظة هزيمة».
وأضاف: «كل اللي حصل النهارده أن الرئيس مبارك وهو داخل قفص المحاكمة قلع النضارة ومسح عينيه من العرق، وبعدها مباشرة ضحك وشاور لنا».
وشدد على أن «الرئيس مبارك لم يبك نهائيًا»، مضيفًا: «ده مبكاش لما سمع حكم المؤبد عليه، هيبكي دلوقتي؟»، مخاطبًا إحدى الصحف الخاصة بقوله: «للأسف بتنشر بالبنط العريض أن مبارك يبكي كأنهم بيتشفوا فيه، ومايعرفوش إن العقلية العسكرية عنيدة إلى أقصى درجة، ومش حسني مبارك اللي ينكسر أو يبكي».
