مسحراتى مصر البهية
اصحى وسبح رب البرية
مشيت أرتل وأنشد وأجود
وصوتى يجرى بين النواصى
هنا بانقر.. هنا باعوّد
هنا باحوّد عن المعاصى
لو كنت بحرى .. لازم أقبّل
وإن كنت قبلى.. لازم أبحّر
ولحد آخر نفس ف صدرى
هاشد قلبى وتر وأسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبح رب البرية..
■ ■ ■
مسحراتى الحكم.. وعندى ليك حكمة
تخلى طعم الحياة.. أيام أمان جاية
الندل داق المرار.. ولو إيديه حاكمة
والجدعنة يا جدع.. ولا أحلى مانجاية
■ ■ ■
سلطان زمانه عزمنى.. مرة مع المحاسيب
وأنا.. أكل فيا الهوان.. عمره ما طاب ليا
والله لأكلها بكرامة.. والله يا ناس ما ح اسيب
لمة صحاب الهنا على أحلى طبلية
■ ■ ■
حاسب من الخوان.. حاسب كمان م اللى
مشى ف طريق الغبا.. لما نما جهله
وإياك تسيب الشرف حتى ولو مِللى
هاتضيع ف بحر الدنس.. وتطب ف مجاهله
على بساط الكريم الكل بيسموا
كرمه فتح الأبواب ف ليله أو ف ضحاه
على بساط البخيل حاسبوا لاتنسموا
مرعوب على لقمته.. ونظرة عينيه فاضحاه
■ ■ ■
لا أبكى يوم ينتصر.. اللى أنا باعاديه
ولا يوم سعدنى خبر.. له ريحة نعناعى
ساعات يكون العلا.. جايب السقوط بعديه
وساعات يكون البشير.. لابس قناع ناعى
■ ■ ■
العاصى رغم الذنوب.. دعوة أبوه ساتراه
ودعوة أمه كمان.. لو برها.. تبره
واللى ظلم والديه.. كل العيون ستراه
ذليل.. إيديه وعينيه من ظلمه يتبروا
■ ■ ■
الحق وتوب لله.. وقول يا خير سلامات
واوعى رياح الذنوب تاخدك طواحينها
اللى افتكر أهو تاب.. واللى - يا عين - سلا.. مات
والتوبة طول الحياة.. ولا انطوى حينها
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب
