مسحراتى مصر البهية
اصحى وسبّح رب البّرية
مشيت أرتّل وأنشد وأجوّد
وصوتى يجرى بين النواصى
هنا بانقر.. هنا باعوّد
هنا باحوّد عن المعاصى
لو كنت بحرى .. لازم أقبّل
وإن كنت قبلى.. لازم أبحّر
ولحد آخر نفس ف صدرى
هاشد قلبى وتر واسحر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هية
ف الذكر آية.. ف العشق غية
اصحى وسبّح رب البّرية..
■ ■ ■
مسحراتى باعلم الأجيال
قصة نضال
بين الكنال والسد
مين اللى فاكر وقفتك يا جمال
بينك وبين الشعب نور ممتد
تحلم معانا نكسّر الأغلال
ومصر جاية بالمدد والمد
■ ■ ■
النيل بيوسع ف الزمان والضيق
وساعات تفيض ثورته..
أو تهزمه التحاريق
يدلق حنان ساقيته..
على غنوة الفلاح
ويجرى بين الصحارى..
علشان يبل الريق
يا نيل ماتستعجلش.. واخد ف وشك ليه
يقول دا حكم القدر..
هو راسم لى طريق
يمشى ولا يلتفت.. ويسيح ف أرض الله
فارد قلوع السفر..
قادر.. جسور.. وجرىء
ف إيده سيف الخلود..
بيشق بيه الصخر
وينتهى ف البحر..
وكإنه أى غريق
المصرى قال زرعتى..
عايزانى أبنى السد
والنيل شديد يا زمن..
بس ابن مصر أشد
مين اللى فاكر وقفتك يا جمال..
بينك وبين الشعب نور ممتد
تحلم معانا نكسر الأغلال
ومصر جاية بالمدد والمد
■ ■ ■
جرى فى الكنال دمنا..
يوصل ما بين بحرين
والقهر يجرى هنا
برضه ما بين عصرين
من عصر حفر الكنال
لحد عصر جمال
الغرب نهب التاريخ
وصدّر الأهوال
الثورة كانت أمل
يبنى الجسور للغد
المصرى قال حقنا
نلحق بوقت الجد
مين اللى فاكر وقفتك يا جمال
بينك وبين الشعب نور ممتد
تحلم معانا نكسّر الأغلال
ومصر جاية بالمدد والمد
■ ■ ■
أمم قناة السويس
وابنى لنا سد الخير
وارسم لنيل الكرامة
من تانى خط السير
الدرس لسه التاريخ
حافظه بحروف من ماس
اللى بيبنى البلاد
هو اللى عاش للناس
ومصر لازم تكون
لكل قادر.. ند
ولكل محتاج سند
ولكل غادر.. ضد
مين اللى فاكر وقفتك يا جمال
بينك وبين الشعب نور ممتد
تحلم معانا نكسّر الأغلال
ومصر جاية بالمدد والمد
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بَنّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب
