مسحراتى مصر البهية
اصحى وسبّح رب البرية
مشيت أرتل وأنشد وأجوِّد
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى
لازم أقبّل
وإن كنت قبلى.. لازم أبحر
ولحد آخر نفس ف صدرى
هاشد قلبى وتر واسحّر
يا مصر قومى وشوفى نيلك
يا مصر قومى وضم سينا
نهر المحبة بينتمى لِكِ
يا مصر شوفى إحنا فين رسينا
مصر البهية.. بالعقل هيه
ف الذِكر آية.. ف العشق غية
اصحى وسبح رب البرية..
■ ■ ■
مسحراتى وآه يانا
أنا وعينى المليانة
عايزين نخطى بسلامتنا
من دنيا زى السلخانة..
أنا مصرى متسمى أسامى..
فرعونى.. قبطى.. وإسلامى
والدنيا محتاجة سلامى
يروى النفوس العطشانة
من قبل قوانين حمورابى
رفضت ربحك يا مرابى
والدنيا كانت طايرة بى
ورضيت أشيلك يا أمانة
المصرى أبوقلب رُهيِّف
من كلمة حلوة بيتكيِّف
ف الصيف على الكوبرى يصيِّف
وف الشتا يقول.. دفيانة
المصرى اللى أقام دولة
حقيقة مافيهاش مداولة
ولسه حكمته متداولة
على الآثار العمرانة
لما حكمنا عمّرنا
ولا عمرنا ف يوم دمّرنا
ولا جورنا يوم.. ولا عورنا
ولا صرنا ف الكون.. ديانة
لكن تقول إيه ف الواقع
لا فيه عدالة ولا شرائع
والقهر أصبح شىء شائع
والحكمة تحتيه فطسانة
أدى مجلس الأمن.. يوزع
الظلم.. ع الناس.. ويمزع
توب العدالة.. ويرزع
وسلاحه.. قوانين خربانة
سايب القوى لوحده يبرطع
يفرد براحته ويتمطع
واللى هاينطق يتقطع
وشعوب بأكملها حزانى
يا دنيا مهما اتطورتى
محتاجة ميتى وشجرتى
توحيدى بالله.. وحضارتى
لو عايزة ترجعى.. فرحانة
■ ■ ■
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يارب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق مافاتها
تطلب هداية وتقول يارب
المصرى بنَّا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يارب
