مسحراتى مصر البهية
اصحى وسبح رب البرية
مشيت أرتل وأنشد وأجوّد
وصوتى يجرى بين النواصى
هنا بانقر.. هنا باعود
هنا باحود عن المعاصى
لو كنت بحرى
لازم أقبّل
وإن كنت قبلى.. لازم أبحّر
ولحد آخر نفس فى صدرى
هاشد قلبى وتر واسحّر
يا مصر قومى وشوفى نيلك
يا مصر قومى وضمى سينا
نهر المحبة بينتمى لك
يا مصر شوفى إحنا فين رسينا
مصر البهية.. بالعقل هيه
ف الذكر آية.. ف العشق غية
اصحى وسبح رب البرية..
...
مسحراتى ف كل زمان
ما أقدرش أنسى هواك يا «جولان»
ما أقدرش أعيش من غير «لبنان»
ما أقدرش أكون.. من غير «بغداد»
يا بيوت «عمان» حبيت وهويت
وزرعت فيكى أمل وجنيت
وليا فيكى أصحاب يا «كويت»
ليهم مع الحرية ميعاد
الوحدة عندى سبع «إمارات»
والحب عندى سبع قمرات
وف «اليمن» ياما الحضارات
بنت وعلت ف الأمجاد
ف «ليبيا» شوف عمر المختار
أبوالفدا وأبوالثوار
شوف «السودان» أرض الأبرار
ربك ينجى من الحساد
مليون ونص شهيد وشهيد
إدوا «الجزاير» معنى جديد
وإدتنى «تونس» أغلى نشيد
عايز الكرامة.. قول يا جهاد
«جزر القمر» أرض العشاق
والعاشقين نحتوا «البتراء»
أهل «المنامة» كرم ووفاء
أهل «الحجاز» بيزيدوا الزاد
صلت «جيبوتى» وقولت آمين
غنوة «قطر» تملانى حنين
ومين ياخدنى «المغرب» مين..
الجنة لما بتبقى بلاد
يا «مصر» يا حلم الإنسان
والوحى إلى أول فنان
على مأدنتك.. انصت لأدان
«موريتانيا» دار شعر الأجداد
يا غربتى و«الأقصى» أسير
وف «الصومال» الرزق عسير
الفرقة صارت لينا مصير
لما التاريخ اتباع ف مزاد
...
مسحراتى ف الذكر هايم
والنسمة حلوة ولا حد نايم
والكل صابح معانا صايم
ف الفجر يدعى ويقول يا رب
رمضان يا أكرم م الشمس ذاتها
أرواحنا عندك تبدأ حياتها
والنفس راضية تلحق ما فاتها
تطلب هداية وتقول يا رب
المصرى بنا وفلاح وجندى
وعندى جامع.. وكنيسة عندى
الرحمة من دا.. والحب من دى
ومن قلوبنا بنقول يا رب
