رقص الهوانم

تسأل..

يقولك فلان سافر..

تسأل يقولك فلان

الله يعينه.. لسه بيعافر

تسأل..

يقولك فلان معذور

لو كان قادر..

كان طل..

وتسأل يقولك فلان.. مل

وراح..

وسلم قلبه لمشرط الجراح

واستبدل كل الأيام الجميلة

وركب دعامة..

لكن تسأل..

تلاقى لسه فيه حد

بيعرف منين يجيب ابتسامة

نظرة رضا..

أحس برحمة ربنا

أكتشف.. أد إيه أنا ضئيل

وعلى أد ما فتحت أحضانى

كنت برضة بخيل..

تصورى..

فى كل مرة يحاول الحزن يسرقنى

يطلعلى ف العتمة قنديل..

يااااه..

ها استناكى

وزى ما اتفقنا أنا وقلبك..

ها تبصى م الشباك

وتشاورى بالمنديل..

وف يوم الفرح

ترقصى رقص الهوانم

زى فراشة بتتصالح مع الطبيعة

ما تعرفيش ساعتها

مين بيميل على مين..

وتجرى تاخدينى بالحضن

كأن عمرك ما شفتى حزن

وتفرحى فرح الشبعانين..

وأشم ريحتك وانتى بتعطرى النيل

وأرجع أحب من تانى الحياة

واستغرب لما الدنيا تسألنى

قلبك طالع جميل لمين

يا واد..