طول عمر المصرى
عنده عزة نفس
طول عمره بيلاقى طريقة
يضحك بيها على أحزانه
ولآخر دقة ف قلبه..
بيحب الحياة..
يبقى مفيش ف البيت
ولا لقمة..
ويقولك مستورة
الحمد لله..
وأول ما تخبط على بابه
بمهارة وخفة دم
ف ثانية يدارى الهم
وف سحارة الكنبة يخبى الآه..
مش بس كده
ده يقولك بالفم المليان
جعان..
احضر لك لقمة..
ويطلع آخر قرش معاه..
طول عمره عايش
راضى..
وساكت..
مابيشكيش..
لو يوم فيه.. وعشرة مفيش
بس الحمل بقى أكبر من طاقته
والحوجة.. والخنقة
ومدت إيده للى مايسواش
كسرته من جواه..
فساد فاجر
فى عز الضهر
سرق عمره وابتسامته
وتعبه وشقاه..
وخلاه بقى فرجة
ونمرة رخيصة ف كل البرامج..
