لما الكبير ينسى أيامه لما الكبير يفشل فى علامه
لما الكبير يرجع فى كلامه يبقى الصغير يعمل إيه؟!
لما الكبير من كلمة يتهور لما الكبير فى الورق بيزّور
يعمل عملية ويقول أتعور يبقى العقل فايدته إيه؟!
لما الكبير يفضل يلوش من الحرام ملايين يحوّش
على كل شىء يروح مكوش طب والشعب يعيش بإيه؟!
لما الكبير ميقولشى الحق آه بالليل.. بالنهار لأ
لما الكدب بيعلى خلق يبقى الصدق لزمته إيه؟!
لما الكبير يسحل جسد وكأن الشعب كمالة عدد
واللى مالوش خير فى البلد من غير بلد بيساوى إيه؟!
لما الكبير يخاف مايختشيش بجاحة فيه.. أخلاق مافيش
لما الكبير ياخد مايديش يبقى النوع ده صنفه إيه؟!
لما الكبير منتهى الصلاحية ولما يبقى مالوش شعبيه
ولسه بيعافر فى الرئاسة طب ومصر ذنبها إيه؟!
لما الكبير بيقولوا قدوة وتسمع نفاق يتقال فى ندوة
لما الصوت يتباع بغدوة يبقى الضمير يتباع بإيه؟!
الجيزة
