أنا الرئيس.. أنا الرئيس.. ولا حد غيرى ينفع رئيس.. انتخبونى وأنا أوعدكم إن الشعب ده كله بكرة يهيص.. بكرة حافطركم حرية وأغديكم ديمقراطية.. وأعشيكم عشا خفيف.. لزوم الرشاقة والتخسيس.. مستثمرين من كل مكان.. تجارة حرة أشكال وألوان.. والقرش حيجرى فى إيديكوا والبركة فى أفكار إبليس.. حنبقى فى حالة انفتاح ع العالم كله مسا وصباح.. والشعب كله يعيش مرتاح وننسى فكرة التوريث.. ومش حنربط يوم حزام.. ونحقق كل الأحلام.. ومرتب فراش الجامعة حيفوق هيئة التدريس.. م المغرب حنّام علشان نصحى بدرى ويّا الأدان.. نجرى على أرزاقنا ونلحق نتشعبط سوا فى الأتوبيس.. وباختصار بكرة حانغنغكوا.. وبالدولار واليورو ازغزغكوا.. ولا حدش أبداً يضايقكوا طول مانا حاكم هنا ورئيس!
المحامى
عضو رابطة الزجالين وكتاب الأغانى
