إحنا اتأخرنا ثلاث خطوات وإن جيت للحق نقول تلاتين
من بعد ما كنا أصحاب وإخوات فى يناير يوم خمسة وعشرين
معرفش الثورة حصل لها إيه؟ ملهاش واحد يترد عليه
والناس بعدت عن بعضيها وأنا خايف من لوم اللايمين
إحنا اتأخرنا ثلاث خطوات
والورق اتستف أى كلام علشان العدل ميوصلوش
زى العبارة بتاعة (ممدوح) اللى التحقيق فيها ماطالوش
كان قاتل ألف واحد ومتين اللى التحقيق فيها ماطالوش
عنده بدال العبارة اتنين والملايين عنده ما يتعدوش
إحنا اتأخرنا ثلاث خطوات
الورق اتستف أى كلام من غير توثيق وشهود إثبات
واتفبرك طبعا زى زمان ومحدش هايلاقى السيديهات
وقابلنى لو كان حد مدان ومحدش هايلاقى السيديهات
أو (يوسف غالى) سأل فينا من بعد ما راح بلاد الخواجات
إحنا اتأخرنا ثلاث خطوات
الورق اتفبرك والتحقيق ما هواش هايطلع حد مدان
وأديك شايف بعينيك ملايين اتنازلت عنها فى لحظة (سوزان)
إيه يعنى سابتلك كام ملطوش دول حبة فكة ما يتحسبوش
وكمان تتنازل لو حبيت لو زنقوها عن كام فدان
إحنا اتأخرنا ثلاث خطوات
لازم نتوحد زى زمان ونكون على قلب راجل واحد
وشباب الثورة مع الإخوان لازم من تانى نتعاهد
ونعاهد كل المصريين إننا نفضل دايماً صاحيين
أحسن لو نغفل ثورتنا من بين أيادينا هاتتاخد
إحنا اتأخرنا ثلاث خطوات
