نظر صاحبنا مرشح الرئاسة إلى زوجته وقال: أنا مش مبسوط لعودة شفيق لسباق الرئاسة.. هنبقى 13 وده رقم شؤم مابحبوش!! ابتسمت زوجته وقالت: ولا يهمك إنت اللى فيهم!! وعلى فكرة ابن أختى جبلك امبارح كتاب فى الاقتصاد.. فقاطعها صاحبنا قائلاً: ياه دا أنا قلت له من أسبوعين ونسيت أتابعه.. ما إنتى عارفة أنا مابفهمش فى الاقتصاد، ولازم أقول للناخبين كلمتين عن كيفية التحسين!.. ضحكت زوجته وقالت: يا حبيبى قولهم هشغل كل العاطلين.. وهوفر التموين.. وهعالج كل المرضى التعبانين.. وهزود المرتبات.. وهجدد الطرق ووسائل المواصلات.. وهسدد كل المديونيات.
وهعمم فى التعليم المجانية.. وهلغى الدروس الخصوصية.. وهزود الرقعة الزراعية.. وهحل الأزمة السكانية.. وكله هيشعر بالأمن والأمان.. وهترجع مصر زى زمان!! ضحك صاحبنا قائلاً: كفاية ضرورى تبقى نائب للرئيس.. خلى الناس تسعد وتهيص!.. فقالت: «يا حبيبى نحن فى مرحلة بيع الكلام.. مع دعاية وأمور متربطة تمام.. هتنجح من غير كلام.. بس أوعى عينك تزوغ على واحدة بنت هرمة.. أقطعك واخليك بسطرمة! فابتسم وقال: ما إنتى عارفة اللى بيّا.. فياجرة مصر كلها مبقتش تأثر فيا!!.. ختاماً أيها الأحباب الكرام من هو ذلك المرشح الهمام؟!
