صدق اللى قال مصر ولادة متقدم لها ألف ريس وزيادة
والخوف يجينا ريس وكالعادة بكرسى الحكم يروح مكلبش
سوق الحلاوة خلاص جبر وإن كان رئيسنا المنتظر
قلبه على شعبه كما الحجر تانى يوم هنقوله فركش
نصيحة من شعب عاش غلبان داق الظلم والقهر والحرمان
وراح رئيسه ورا القضبان بعد ما كان ع الوطن مكوش
ياللى ناوى تحكم بلدنا يا تحكم صح يا إما تسبنا
ما فيش وقت نجربك وتجربنا شعب مصر أصبح مخربش
عاوزين رئيس يكون إنسان ما ينامش شبعان ومواطن جعان
رئيس لسينا ولبعد أسوان يكون مصحصح مش مدروش
صدره واسع ما يتعصبش ويصحى بدرى ما يتأخرش
وياريت صورته ما تتعلقش وينسى إنه فى يوم يحوش
يكون سلوكه فعل وقول وما لوهش فى الريموت كنترول
يحاسب ويتحاسب بالأصول الشعب عمره ما هيطنش
عاوزين رئيس ببرنامج محبش يكره الفساد.. والظلم ما يحبش
يكون شباب ما يبقاش مكرمش موجود يا ترى؟.. أنا ما أظنش
الجيزة
