«سعد الصغير» صراحة مش كتيرة عليه
يكون رئيس للبلد ويلمنا حواليه
منها هانفرح شوية بعد حزن سنين
ومنها مش راح يكوش على البلد بإيديه!!
■ ■ ■
صادق وواضح ومكذبش علينا زمان
ومكنش سُنى ولا واحد من الإخوان
ولا قال هاشكل حكومة ولا هاسيطر على المجلس
ولا عمره قدم تنازل منه للسلطان!!
■ ■ ■
و«دينا» ممكن تكون نائب عن الستات
شاطرة ومتعلمة ودارسة آداب ولغات
وكمان بحبة دلع راح تشغل النواب
وهايحلقوا دقنهم وهايبقوا ناس شربات!!
■ ■ ■
«سعد الصغير» كبيره فيلم ولا اتنين
ومالوش فى نهب البنوك ولا سرقة الفدادين
وبانى مسجد بعرقه ومن فلوسه زمان
يعنى محدش يقول مطرب معندوش دين!!
■ ■ ■
عنده كاريزما عن «الشاطر» وعن «حسنى»
وعن «الكتاتنى» اللى ناوى بطعمه يفرسنى
ودمه خفيف عن «شفيق» وعن «عمر سليمان»
والمجلس العسكرى اللى جاب طرطور ولبسنى!!
■ ■ ■
«سعد الصغير» ولا بينطح ولا بيرفس
هايخلى كل البلد فرحانة وبترقص
ودماغه متكلفة وذوقه كمان عالى
هايكون لأهل البلد حاكم أمين مخلص!!
■ ■ ■
و«سعد» أحسن كتير من اللى بالى بالك
ومراته مش عقربة فى الجحر لبدالك
وولاده مش طماعين ولا مشغولين بالمال
ادعيله يبقى رئيس مخلص وعقبالك!!
القاهرة
