مين هو ده اللى بيقتل الناس فى الميدان ولا نعرفوش.. مين اللى صاب عين الشباب برصاص حقيقى وما انتهوش.. مين الجبان اللى استهان بالإنسانية يا ناس وحوش.. مين فجر الناس فى الكنايس غير كلاب ما بيرحموش.. مين اللى بالخيل والجمال قتل الرجال ولاهموش..
مين كانوا بيعروا البنات وبيسحلوهم وما استحوش.. مين مثلوا بأمواتنا جهراً فى الطريق ما استعبروش.. مين اللى كان قناص جبان شوه بطلقاته الوشوش.. مين اللى هجموا على المحال وعلى البنوك علشان قروش.. وفى بورسعيد سبعين شهيد من غير سبب ولا أجرموش.. مكتوب يسافروا يشجعوا ويموتوا غدر ما يرجعوش.. وارجع وأقول للمسؤولين صارحونا مرة ما تكدبوش.. كفاياكوا ضحك على الدقون بكلام عبيط ما نصدقوش.. مين هو ده الطرف الخفى وإزاى وليه ما تفضحوش.. وإذا كنتوا خايفين كلكوا يا جماعة ليه ما بترحلوش؟.
15 مايو
