أتارينا مش بنحبك بس.. أتارينا فى ترابك بندوب.. وإن حد مسك بالسوء مس.. نمحيه ولا نخلى له وجود.. أتارينا شايلينك فينا.. والموت فداكى بيحيينا.. يا مصر يا أحب مالينا.. حبك ملوش فى قلوبنا حدود.. النيل مبيجفش عمره.. قومى وصبيه بإيديكى.. واسقى أعاديكى مرة.. وشهده للى يحبوكى.. الأمر بعد الله أمرك.. نادينا كلنا فدا عمرك.. للجنة ماشيين على جمرك.. بالحب ضمى خطاوينا..
يا مصر باسم الله عدى.. بكرة الجميل مستنيكى.. مدى الخطا بقوة ومدى.. الله يبارك خطاويكى.. عمل وعلم ومدنية.. إيمان وأمن وحرية.. الكل عندك سواسية.. بالعدل خيرك يكفينا.. متدمعيش ع اللى خانوكى.. دول مش ولادك يا عظيمة.. يا أم الرجال مين قال إنك.. خلفتى يوم خلفة لئيمة.. ولادك اللى بيحموكى.. وبكل غالى يفدوكى.. أما اللى فى الشدة رموكى.. متعمليش ليهم قيمة!!
