مصر فعلاً عاوزة تفهم كان الوطن عايش بيحلم
خليط ملخبط خلطبيتة يدوخ أعظم خبير بيفهم
والأحوال ما بقتش تُسر إزاى نفسك تبقى حر؟
وأنت قمحك مش بإيدك سيبك من حبيب يضر
راح زمن الصنايعية خلاص وابتدا زمن البلطجية
وعشان تعمر لازم تهد قصور الفقر المفترية
عمرك شفت ثورة تسرق واللا ثورة مزاجها تحرق؟
الثورة قامت.. الضل قام نقول إيه.. حاجة تفلق!
الإيمان بالثورة ضرورة وشعوب غيرنا بينا فخورة
بقى لينا قيمة ومكانة طب إمتى نخرج م الماسورة؟
قلوب كتيرة يا وطن تحبك وقلوب كمان للخلف بتشدك
ومخابز ملهاش فى الخبيز تقرصلك وتعجنلك وتخبزلك
لا والمصيبة ناس حبايبك يتمنوا لك تزيد مصايبك
يتمنوا لك تتوه.. تنحرف.. تخرف! يعنى زهايمر وتزيد غرايبك
خايفين عليك من الحرية خايفين لتبعد عن الطعمية
والتغيير أكلة تتعبهم تعمل حموضة ومرارة سياسية
خراب البيوت يبدأ بكلمة وعمار الوطن يبدأ بثورة
والشهيد حى يرزق والمولود بدايته صرخة
