فى موقعة بورسعيد شوفت الفلول حاضرين
وكل واحد معاه سنجة وسبع سكاكين
والأمن تايه ما بين حلق وما تحوشى
وشباب بيصرخ صريع لكن تقول يا مين
فى موقعة بورسعيد كان الضمير غايب
وكل مسؤول كبير طلع هناك خايب
وتهموا فى الألتراس والألتراس مظلوم
والعيب ماهوش فى الشباب العيب على الشايب
فى موقعة بورسعيد كان الخداع موجود
والثعلب اللى انطرد عايز لجحره يعود
وكل ثعلب خبيث خلف البيبان هربان
عمل عمايل ليلتها تشيب المولود
فى موقعة بورسعيد كان الشباب بيموت
ما بين ضمير فيه عطب والضرب بالنبوت
والغدر بالأبرياء طايح فى كل مكان
مستكترين على الشباب ليله بفرحه يفوت
فى موقعة بورسعيد شوفت الوطن مهموم
والحزن حاطط عليه والحزنانين بالكوم
وعزرائيل الدموع مالية عنيه الاتنين
صعبان عليه الشباب اللى اتقتل مظلوم
فى موقعة بورسعيد قالوا مافيش تقصير
فاكرين إن الكلام بيوجهوه لحمير
مسلسل القتل فينا من زمان شغال
علشان فى قلب الميدان نادينا بالتغيير
