يا جماعة لازم نتسامح والجو يهدى ونتصالح
ونهنى بعض ونتصارح ونقولوا وإحنا بنتصافح
مش كل الشرطة جهاز طالح ولا جيش الأمة ما عاد صالح
دى الفرقة ما بينا غلط فادح والمستفيد منها الفالح
وبلدنا محتاجة نكافح والثورة يبقالها ملامح
وبرلمانّا يكون ناجح ما يكونش مبنى على مصالح
ولا حد من مصر يبارح ويعود إلينا تانى السايح
ومكان الدم كده السايح نزرع أزهار وشجر طارح
وكفايا مشاكل وفضايح وفرجة الجاى والرايح
المستفيد منها الجارح واللى نهب خيرنا إمبارح
وياريت كلامى يكون واضح والفاسد يشرب م المالح
ونشوفوا وإحنا بنتصالح دنيتنا تانى بلون فاتح
عثمان بحور - ميامى الإسكندرية
