يا مصر قومى وارفعى صوتك.. ياما دفعتى التمن بالدم فى سكوتك.. يسلم شبابك يعدلوا المايله.. مهما تزيد المحن مايعلنوش موتك.. يا مصر قومى ومزقى خرسك.. خلى شبابك فى الميدان حرسك.. يحموا حماكى والأيادى شداد.. دقات قلوبهم فى الخطر جرسك..
يا مصر قومى للصباح وامشى.. فكى قيودك والضلام هشى.. خدى من شبابك عطرك الفواح.. وف بهجة الأفراح وزعى ورشى.. إوعى تنامى اليوم ولا بكرة.. زرعوا شبابك للأمل خضرة.. انتى الأبية وتاج العز فوق راسك.. ما ترضخيش للذل والسخرة.. جه النهار فوق الكتاف مرفوع.. يتحدى ليل الطغاة والبلطجة والجوع.. صوت الضيا جوه الميدان هادر.. ومين يصادر حلم جه مشروع.
قنا
