يا غادة يا بنت البلد.. يا طاهرة الروح والجسد.. قولى لمن عروكى لأ.. مهما الهدوم عنك تُشق.. قولى لمن بيخالفوا حق.. قولى لهم: أحدٌ أحدْ.. البنت نازلة تجيب لكم.. من العساكر حقكم.. اتريقوا على لبسها.. واتشفوا ياللا فى عريها.. وبلاش تناضلوا زيها.. يا شعب يا كمالة عدد.. يا غادة يا بنت البلد..
يا طاهرة الروح والجسد.. ما يهمكيش كلب الحراسة.. والخدامين لكل ساسة.. إنتى اللى كاملة فى الشرف.. وهما عدمات الشرف.. رجالة إيه.. ياااادى القرف.. لو دولا رجالة البلد.. بكرة ولادك يطلعوا.. رافضين لظالم يركعوا..
انتى وبنات هذا الميدان.. وسام على صدر الزمان.. جان دارك ماتت من زمان.. لكن انتى جبتيلنا المدد.. يا غادة يا بنت البلد.. يا طاهرة الروح والجسد.
باحثة تربوية - قسم أصول التربية
جامعة عين شمس
