كل واحد فينا شايف فى حياته هم.. اللى همه أكله وشربه.. واللى همه حب عمره.. واللى همه وظيفة الخيال.. واللى همه شىء محال.. اللى خايف على صحته.. واللى همه آخرته.. واللى حابب دنيته أو ضيع عمره وضيع صحته..
كل واحد فينا همه حاجة كانت كبيرة أو بسيطة.. هى فى الآخر همه.. وهى فى الآخر فكره وشغله.. فى ناس همها بلادها.. وناس همها عيالها.. وفى هم ما بيخلصش وهم ما بيقعدش..
كل واحد فينا شايل هم!.. يمكن يخصه أو يخص حبيب ليه.. هو شايل هم كان فى قلبه كان فى عقله.. همه فلوس أو نفوذ.. المهم إنه هم.. كان كبد أو نكد هو وعد اللى وعد وما يخلف ما وعد «سبحانه».. بس كلمة يمكن تكون بسيطة.. لكن هى فى الآخر حقيقة.. ارمى على الجبار اللى قدر الأقدار.. وماتقولش للناس همى كبر..
وقول يا هم ربى قدر.. وخلق الكون وعفا عن المظلوم.. ورحم كل تواب ومحروم.. رب موسى والأسباط.. رب عيسى والأصحاب.. رب محمد والأنصار.. والصحابة الأخيار.. هو خلق الفتن.. خلق العبر والمحن.. اصبر تنول جزاه.. واصبر تنول رضاه.
