زمان وإحنا عيال صغيرين.. كان بيجى أبويا يلمنا.. ونقعد قصاده.. ويقولنا.. ويشرح لنا.. يعنى إيه كلمة مبادئ.. ويعنى إيه معنى الاحترام.. ويعنى إيه اسكت واستمع.. لحد ما يطلب منى الكلام.. علمنا يعنى إيه نضحى.. ونخاطر.. وإن جه الموت نموت.. مانخفش م المخاطر.. دا العمر واحد.. وهاينقضى..
وكده ولا كده هانموت.. بس نموت بشرف.. نموت لهدف.. وعلمنا إزاى نكون أحرار.. وإحنا ف قلب الحصار.. وعلمنا إزاى يكون لينا رأى.. وتكون لينا كلمة.. وي
كون عندنا منهج وأفكار.. هوه الإنسان إيه غير حبة أفكار.. وعلمنا إن السياسة.. لعبة كراسى متحركة.. كل واحد وليه دوافعه.. اللى عايز شهرة.. واللى عايز سلطة.. واللى عايز الحصانة بس..
علشان الألاعيب والأونطة.. إنما الناس اللى عايزة تخدم بجد.. دول يابنى مبقوش كتير.. دول بقوا على صوابع الإيد ينعدو عد.. جزء منهم بقى فى السجون.. وجزء تانى بقى للأسف مجنون.. وجزء تالت زيى أنا على المعاش مركون.. وعلمنا كمان يعنى إيه كلمة شرف.. ويعنى إيه كلمة كرامة.. يعنى إيه كلمة عدالة..
بس استحالة.. يكون فيه بنّا عدالة.. إذا مات فينا الشرف والكرامة.. وعلمنا إزاى نناضل ونكون ثوار.. وإزاى نكون إيد واحدة.. فى مواجهة التيار.. محتاجين كلنا نكون إيد واحدة.. نقول للظلم لا.. نقول للفتنة لأ.. للغش لأ.. للمحسوبية والرشاوى لأ وألف لأ.. لازم نفوق.. ونحاسب اللى فوق.. اصحوا يا ثوار.. اصحوا يا ثوار.. كفايانا نوم وانتظار.. كفايانا نوم وانتظار.
محاسب
الفشن- بنى سويف
