أنا من بكره حاعمل رئيس وحاخلى كل الشعب يهيص.. وحاوريكوا اللحمة حقيقى ولا أكل بصارة ولا فول تدميس.. وبعد ما جوعتوا سنين وسنين واللحمة ليها ف البطن حنين.. آن الأوان للعيشة الطين تنسوها بقى رحل التدليس.. وبعد ما كانوا علينا جواسيس وكل شوية يجينا بوليس.. اتحررتوا من المهاويس وأمن الدولة ماتوا فطيس.. وكل فولة وليها كيال وخلاص ضمنا يجينا المال..
وشوية شوية استنى يا خال عم عصام يفك الكيس.. شبعنا من الفقر وم الجوع وخلاص مفيش ف الخطوة رجوع.. لو حتى جابولنا كؤوس ودروع ثورتنا بقت هى الموضوع.. ويارب عجل وإحنا مسامحين باسم الإخوة وباسم الدين.. مش ح نكون فيهم شامتين بس الرحمة هرانا الجوع.. ولادنا وضحوا بالأرواح وإحنا معانا فى القلب جراح.. ولغاية مانخلّص ع الأشباح مش ح نقول عمرنا ما هو راح.. لسه بكرة الجاى بنور والفرحة جاية عليها الدور.. وحنقول للفقر اتفضل غور وحنملى بلادنا بالأفراح..
القاهرة
