الحكم مش بالسيف.. والعدل مش بالكيف.. يا شعب يا مكبوت.. راجع لكتم الصوت.. والحكم بالنبوت.. وكأنها مكنتش، ثورة وقطمها حمار.. مسروقة م الثوار.. والفاعل هنا مستتر، ومتخبى ف الدواليب.. لابس قناع لحبيب.. ومخبى وش الديب.. والبرد مش مستور.. لابس شهادة زور.. يا وطنى يا محبوس.. بين الديدان والسوس..
سايق عليك الليل.. ماتسبش قلبى عليل.. خوفى عليك وجّاع.. وماعدش قلبى يساع.. حزن ودموع بالكوم.. نستنى طعم النوم.. يا وطنى يا مظلوم، فيك الشهيد متهم.. والجانى ما له حساب، والجرح لم يلتئم.. طول ما البعيد متساب، يا عدل يا هربان.. قطرك بلا قضبان.. رضينا ليه بالهم.. حيرة وحرقة دم.. يا تمشى ع الصراط، يا ترحل بقى وتتلم!
