عدت سنة والموت بعيد.. الثورة مش للموت يا عم.. بهدلتو قلبى لبس جديد.. بعترتو دمى لمونى دم.. أنا مش لوحدى فى الميدان.. جنبى هنا الواد اللى مات حاضن علم.. حاضنة العلم.. رافض يسيبه للممات أو للعدم.. آه يا صنم قاعد هناك يعبد صنم!..
راح الزمن وجه زمان غير الزمن.. إمتى هيوصل للى خان مين اللى صان فينا الوطن؟.. عدّت سنة ويا خوفى تيجى كمان سنة.. وأنا والشهيد واقفين هنا.. وانت هناك.. مانتاش ملاك يا كل من خان حلمنا.. من حقنا نفرح ساعات.. يا كل عشاق الكلام حبة سكات.. اسمعوا لصوت الشهيد وهتعرفوا.. مين فينا حى ومين اللى مات.
