ثورتك ماحد يقدر يلطخها.. همتك ماحد يعرف يزحزحها.. يا مصر يامو الجبين عالى.. أمجادك التاريخ بيشرحها.. شعبك الوفى حموله وصبره كبير.. لما يثور بيثور من غير تأخير.. ميادينك طول عمرها عليه شاهدة.. أولها عابدين وآخرها فى التحرير.. وآدى العباسية ندية قامت تصحح.. يناير المجيدة ماحد يقدر يزحزح.. شعبك وجيشك جسد واحد.. بستان محبة قوية ريحته تفحفح.. يا عرابى قول لاحفادك فى التحرير.. الثورة قامت مافيش مناص م التغيير.. ماهيش وليمة مصرنا بيقسموها..
الشعب كله لازم يقرر المصير.. لا تقولّى سلفى يا خويا ولا إخوانى.. ولا ليبرالى يا صاحبى ولا علمانى.. قولى مصر عايشة ف وجدانى.. عايزينها حرة لولادى وخلانى.. الشعب طلع بعد طول انتظار.. ما هو صبره فاق اللى فى الصبار..
الشعب طلع بإيديه ياخد القرار.. لجل ما يجيب م الضلمة نور النهار.. من غير وصاية يقول كلمته.. بإيديه يعزل اللى سرقوا بسمته.. يختار اللى يعرف يرسم سكّته.. يختار اللى يعرف قيمته ومحبته.. الصندوق هووه اللى حيقول.. مين العدو ومين م الفلول.. مين اللى يمسك الشراع.. مين اللى كان عامل بهلول.. زمن التزوير خلاص راح..
الشعب قال حى ع الصلاح.. عمر اللى فات ماهيرجع تانى.. إرادة الشعب هيه الوشاح.. طره بكرة تحكى وتقول للتاريخ.. ع اللى كانوا فى السما مصابيح.. لما خانوا الأمانة دخلوها.. سيرتهم بقت غنى وتواشيح!!
مليج- شبين الكوم- منوفية
