بجد خلاص تعبت معاكو وحيلى إتهد.. واللى بيحصل فيكى يا مصر ما يرضيش حد.. وليه علمانى وإسلامى ولا مدنى أو حتى إسبانى.. المطلوب دستور مظبوط يحكمنا من تانى..
ومتقولش مسلم ولا مسيحى.. دا الخير والهم طايلك وطايلنى.. والسماحة والحب جوه قرآنك وإنجيلى.. ومية النيل بتجرى فى شرايينك وشرايينى.. وليه أعاديك وتعادينى؟.. ده حب مصر بيجمعنا.. ودم شهيدى وشهيدك عليه مجتمعين،
على الحلوة والمرة عايشين راضين، ومين اللى بيعمل الفتنة؟ غير ضعاف النفوس وكبار المنتفعين، إصحى يا صاحبى وفوق.. دول عايزينا فى نار والعين، ولو طلبنا منهم يطفونا، مش حيطفونا غير بالبنزين!! إصحى يا صاحبى وفوق!!
