يا أى واحد

يا أى واحد فى أى دولة.. الظلم طايح شغال علوله.. بناكله عيش مفرود فى طاولة.. بنحلى بيه زى الفراولة!..

 يا أى واحد فى أى قصر.. فيه ناس لمونة معصورة عصر.. وهيكل محارب مادقش نصر!..

 يا أى واحد فى أى عشة.. كم ألف ظالم راحوا كقشة.. أصل التاريخ ماسك مقشة.. يكنس ويرمى ناس كانوا عفشة!..

يا أى واحد فى أى حارة.. مظاليم بلادى مساكين حيارى.. م الظلم دابو بقواع المحارة.. وصراخهم كأنه همس ف مغارة!..

يا أى واحد فى أى شارع.. الماضى سيبه شوف المضارع.. يظلم ويطغى يضرب يصارع.. يظلم ويطغى يضرب يصارع.. يكبش ويهبش ف اللهط بارع!..

 يا أى واحد فى أى مول.. فيه ناس رجال وناس ديول.. بيطاطوا راسهم لدول ودول.. علشان مناصب بكرة تزول!..

 يا أى واحد فى أى بيت.. هيفيد بأيه كتر الصويت؟..

ماتفوق بقه وخليك حويط.. إن طال سكوتك هتكون عبيط!..

يا أى واحد فى أى حتة.. الظلم دايم لحد أمتى؟..

 دى كلاب بتنهش فى كل حتة.. إن راح تلاتة بييجى ستة!

- بورسعيد

[email protected]