الشرطة لازم تشتغل والكل يرجع للعمل.. خلينا نفرح بالحياة بعد ما عاد لينا الأمل.. وخلى الشرطة تشتغل خلى الشرطة تشتغل.. شعب وشرطة وجيش مغاوير أجمل حاجة فى التغيير.. نحمى بلدنا نقول لولادنا رجل الشرطة ده قدره كبير.. أنا أحترمه وهو كمان لا يعذبنى ولا أتهان.. ويعرف برضه إن أنا إنسان ويبقى الحب له بينا مكان.. وفى قلب بلدنا نعيش فى أمان.. أصلنا شعب ملهش مثيل وقت الشدة يا مصر أصيل.. وقت الشدة الإيد فى الإيد نحمى بلدنا أرض النيل.. كلنا نفتح صفحة جديدة ونبدأ خطوة للتعمير.. وننسى الماضى بثورة مجيدة ماشية فى طريق التغيير.. خلت كل قلوبنا سعيدة وصحبة فى ميدان التحرير.. ضابط الشرطة ده بابا وعمو وكمان خالو وهمّك همّو.. فى الشارع ماشيين فى حمايته وفى البيت برضه أمان فى رعايته.. بتنام مطمن على بيتك وهوّ عيونه السهرانين.. علشانك وعشان أولادك أقسم لينا بأغلى يمين إنه يضحى بوقته وجهده لخدمة كل المصريين.. وإحنا كمان من هنا بنقول له إنت لمصر النور والعين.. وكل أملنا الوطن الغالى نحميه سوا من أى إيدين.. تلعب فيه من برا بلدنا وكل عيوننا عليها صاحيين.. أصل بلدنا دى أم الدنيا وياما حواليها كتير حاقدين.. مش عايزينها أبداً ترجع زى ما كانت حرة سنين.. بعد الثورة الغالية ما نجحت واتحررنا إحنا الملايين.. شعب وشرطة وجيش ومعاهم شفنا حلاوة المصريين.. شفنا جمال مصر الولادة فى يناير لشباب حلوين.. عزم وقوة وأغلى إرادة وثورة عظيمة على الفاسدين.. خلت كل العالم سلم إن المصرى بلده أمين.. علشان كده أنا وأنت وهو حنحمى حضارة الفراعين.. والبلطجة من بره وجوه كلنا ليها نكون صاحيين.. نحمى الشرطة كمان تحمينا وآدى أصالة المصريين.. بالأخلاق راح نبنى بلدنا ترجع بينا مصر منارة.. ونعلمها كمان لولادنا ونبنى معاهم أغلى حضارة.. ونرجع كلنا وبأعمالنا نخلى الشرطة تشتغل!!
