يا مصر هانت وبانت وكلها كام يوم.. هانت وآن الأوان من بعد نومة نقوم.. والفجر شقشق ونور الشمس جاى أكيد.. والنيل معاه يا جميلة هايجى عايم عوم.. يا مصر هانت أدينا على الطريق ماشيين.. بدايته خطوة ولكن إحنا مشينا اتنين.. وقطعنا مشوار طويل باقى خلاص نوصل.. لازم هانوصل ما دومنا على الأمل قادرين.. يا مصر ما يهمكيش الصبر مش ها يطول.. العين خلاص فتحت ودراعنا قد القول.. قادرين بعون ربنا نقضى على الأوغاد.. اللى زمان أكلونا الوجبة تبن وفول.. يا مصر هانت وبانت نية الأوباش.. توبة هايملك زمامك اللى ما يسواش.. وتوبة تغفل عنينا عن ترابك يوم.. وتوبة تانى يا غالية يروح هواكى بلاش.. يا مصر ضمى الولاد حضنك يساع ملايين.. يا مصر إنتى الأمل وإنتى ضياء العين.. يا مصر مهما الطريق قابلنا فيه عقبات.. عن الأمل والكفاح يا مصر مش راجعين!
