لملم جراحك يا وطن لسه طريقنا طويل.. الجرح مش راح يدوم ما دام فيك الحيل.. طول ما دراعك عفى وفيك جمال الروح.. شمسك هاتطلع يوماتى فوق شطوط النيل.. لملم جراحك وهات إيدك معايا وقوم.. والشمس أكيد هاتطلع بين ضباب وغيوم.. لملم جراحك ولم زبالة الأيام.. خلى طريقنا جميل لسه الأمل قدام.. كوم الزبالة كبير، لكن هانقضى عليه.. ونعيش بقية عمرنا فى نور وخير وسلام.. مفيش فى زمن النضال حلاوة من غير نار..
لازم تكون يا وطن وقت الآلام صبار.. ياما اتجرحنا كتير وداوينا ياما جروح.. ووقعنا ياما وقومنا نكمل المشوار.. هانت وفاضل على بلوغ الأمل شبرين.. وإحنا كتبنا التاريخ بأيدينا من ساعتين.. مدام استجاب القدر لإرادة الثوار.. قوم يا وطن وابتسم وافرح مع الملايين.. هز الهلال يا وطن واطلع لزمن النور.. دار الزمان دورته وإحنا علينا الدور.. نفرح ونبنى وتعلا لفوق كمان وكمان.. ونلبس اللى ظلمنا وذلنا طرطور!
