عشان تبقى عارفة مفيش احتمال يا أبيض يا إسود يا معدول يا مال
يا عاشق ترابك ونيله شرابك يا كاره جنابك وناهى الوصال
يا عايش فى خيرك وفاكر جميلك يا ناسى وناهب فى قوت العيال
يا حامى حدودك وصاين عهودك يا خاين وهاين وموته حلال
يا ساجد فى مسجد يا عَابد فى معبد يمارس شعايره على أى حال
يا ماشى فى سربك يمهد فى دبرك يا إما يحاربك بخيل وبجمال
يا عابس ويائس خلاص سبنا خالص يا سيدى إحنا نقدر نجيب المحال
يا مصر إنت فاهمه إللى عاوز مساهمة وفاهمه إللى كاره معانى الجمال
وعارفة إللى سرك فى حلوك ومرك وعارفه إللى ضرك وجابلك وبال
وعارفة إللى سبك ودارى إنه حبك وعارفه إللى معرفش حبك وقال
يا مصر الحكاية مهش بالأسامى هتنوى تعمر تبطل جدال
متفضلش دايماً تشاور بسيفك ولا بشال ولحية وطاقية وعقال
أبوس إيد ترابك تجاوبى السؤال يا مصر إنت حافظة أسامى الرجال
رجالك يا مصر إللى حاربوا عشانك ولا استنوا سلطة ولا استنوا مال
ورجعوا لمصانعك ودابو فى مزارعك سوى يد واحدة صليب أو هلال
نوايا سليمة وإخلاص وقيمة دا أكبر جريمة النفاق والضلال
الشرقية - ديرب نجم - أبوعبدالله
