لسه الشيوخ والعمد والقاضى بالتعيين
والنائب العام وكافة وزراء ومحافظين
سلطات فى إيد النظام عارفة اتجاه الريح
وعارفة قطر النظام لازم يروح على فين؟!
الجرح من كام سنة مقيح لكن مقفول
ولما زاد الألم صرخت قلوب وعقول
ولما طول العلاج حيّر طبيب واتنين
فتحنا كل الجراح بإيدينا عرض وطول!!
الثورة قامت ولسه واقفة بتعافر
جيش الديابة كبير وكل ديب كافر
غير التعالب وغير الحية والتعابين
دا غير حرامى كبير وقت الحساب سافر!!
عينى عليك يا شباب متصاب فى نن العين
دمك ودم الشهيد راحوا فى رقبة مين؟
سبع شهور والعدالة تايهة فى ملفات
وحكمت المحكمة لكن على الغايبين!!
يظهر كده مش هينفع الكلام بالذوق
وعيب يكون الجزاء من بعد ثورة خازوق
وعيب يضيع دمنا فى حب مصر بلاش
وعيب ما يسمع آهاتنا اللى قاعد فوق!!
