عايز أرشح نفسى فى انتخابات الرياسة
وده حقى لأنى مصرى وعارف ده بالفراسة
المدام مش أجنبية لا من باريس ولا مغربية
لا بتتدخل فى شغلى ولا ليها فى السياسة
اختارونى وأنا هاقضى لكم على شبح البطالة
وانشر الأمان فى عهدى والمساواة والعدالة
وعشان الشعب هامشى فى البلد من غير حراسة
اختارونى وأنا أخلى الأمان فى كل حارة
وابنى للشباب مساكن بدل الشقة عمارة
واللى عايز قرض ياخد حتى لو من غير دراسة
اختارونى وأنا أرجع تانى للشعب السيادة
واللى يطلب غاز يلاقى وأخلى العيش بالزيادة
وأمر الشرطة تعامل الجميع من غير شراسة
أوعدكم لو تختارونى انى أرفع مستواكم
ودايماً أخدم بلدنا علشان أكسب رضاكم
وماتخافوشى انى أخلى ابنى حاكم بالوراثة
عايز ارشح نفسى فى انتخابات الرياسة
اختارونى ده أنا مصرى وأبويا مصرى بالأمارة
وحزبى حزب التاريخ والعروبة والحضارة
ولو فى يوم قلتوا لى امشى راح امشى من غير غلاسة
مسارة - ديروط - أسيوط
