كاتب لبكرة جواب من الهم والدم.. كاتب لبكرة جواب من وحى المعاناة.. باحكيله عن ناس مش راضية تتهد ولا تتلم.. باوصفله شكل أحلام شعبى وكل اللى بيتمناه.. وشعبى بسيط حلمه.. سهلة مطالبه.. مش طالب قصور ولا ذهب فى إيده.. ولا طالب شىء يصعب تحقيقه.. كل اللى طالبه عيشة نظيفة ولقمة نظيفة.. ومكان يئويه.. ومايتهانش ما يستعبدش لحاكم يبقى سيده.. كل اللى طالبه ياخد حقه.. من اللى قتلوه.. وفى عيشته طهقوه.. وفى السجون رموه.. فى عز النهار سرقوه.. طالب عدل وأمان.. معاملة إنسان.. ضمير يبقى هو السلطان.. يا ترى مطالبه حرام؟!.. ولا ولاد الحرام.. مش ناويين فى يوم يسعدوه.. كاتب لبكرة جواب.. باترجاه ييجى أحلى من إمبارح!!
ياما شفنا فى ليل إمبارح ذل وقهر ذابح.. ياما شفنا وجع فى صدورنا سارح.. باترجاه يجيب معاه الأمل الطارح.. يطرح ورود فى البساتين.. يداوى جراح الغلابة والمساكين.. يعلى بالعزيمة للسحاب الناطح.. باترجاه مايبقاش شبه الليالى الكحيلة اللى فيها.. جاتهم ستين نيلة.. زيفوا الحقائق.. وخلوا الواحد مش طايق.. وبيدعوا البطولة والشرف.. والبطولة والشرف عن أمثالهم بعيدة!! كاتب لبكرة جواب.. باحكيله عن آخر حوار لىَّ معاها.. حوار اتنين أحباب.. فى الميدان بيتغنى بيه الشباب.. على نغمة السمسمية يتلحن مقطوعات.. ويفرش الأراضى المصرية ورد بدل التراب.. وكان الحوار كالآتى: إنسى اللى فات يا بلادى.. وتعالى أحكيلك ع اللى جاى.. أنسى المناصب والكراسى.. ميلى على هواى.. إنسى كل ظالم وإنسى كل سفاح.. إنسى المظالم إنسى اللى راح.. أنسى ذل الليل وانسى قهر الصباح.. وتعاليلى أحقق فيكى مناى.. إنسى اللى سرقوكى وإنسى اللى نهبوكى.. وارميهم ورا ضهرك.. وافتكرى اللى عشانك وقف فى ضهرك.. إنسى اللى باعك واشترى رخيص.. وافتكرى اللى سهر فى ميدانك يدفع مهرك.. أصلك يا بلادى تستاهلى أكتر من كده.. ضحينا بأرواحنا ودمنا.. وبعد كده جهدنا وتعبنا.. وإخلاصنا فى عملنا.. هايبقوا دليلنا على حبنا ليكى وعشقنا!!
كلية صيدلة - الجامعة المصرية الروسية
