عبى وحطى جوه سجونك.. اللى كان يسرق ويخونك.. اللى كان بيمصمص دمك.. واللى كان بيغمى عيونك.. سدى عليهم باب زنازينك.. ياما نهبوا سلبوا خزينك.. ياما خنقوا الصوت ف حناجرك.. خلوا شمالك يبقى يمينك.. حطى إيديهم جوه كلابشك.. طالع نازل واكل هابشك.. خلوا حياتنا طفح مجارى.. مالى جيوبه خاطف كبشك.. بصى عليهم بعيون حرسك.. ياما حطوا قيود على فرسك.. خلوا الحلم معاكى بينزف.. كرهوا أذانك رنة جرسك.. خلى همومك حبل مشانق.. للى بيرصد نفسك خانق.. كان بيدبح ضحكة طفلك.. ويبوس كل عدو يعانق.. إدى مؤبد أو إعدام.. حكم مشدد ألفين عام.. سرقوا سنين العمر الحلوة.. وكل كلامهم كان أوهام.. سجن الوادى طرة أبوزعبل.. حطى حرامى كان يستهبل.. خلوا صوت الباطل يعلى.. خلوا الحق ضعيف يتكعبل.. شدى قيودك ع السفاح.. اللى خلا السرقة كفاح.. خلا كل الضحك أونطة.. بفلوس قمحك كل تفاح.. إدى المجرم أقصى عقوبة.. للى جابوا الحر فى طوبة.. خيرك كان مكفى العالم.. كانوا يقولوا عليكى مخروبة.. عبى وحطى جوه سجونك.
سوهاج
