خربها وقعد على تلها.. أفسد زرعها وقمحها.. كان قاعد فى حضنها.. وقال أنا ابنها وابن بطنها.. جاب آخرها وفاض كيلها.. حسم أمورها وحلها.. خبى جريمته فى جحرها.. وقال ذمتى مافيش زيها.. وأكل خيرها وعزها.. وكمان باع أرضها.. وقال أنا ابنها وابن بطنها!..
سنين قاعد على قلبها.. ويقول والله بحبها.. وبخاف على عرضها.. لازم أحافظ على أمنها.. قتل شبابها وأحلامها.. وقال والله بحبها.. وأعشق ترابها وأرضها.. بجاحة ما فيش زيها.. عشق ترابها ومص دمها.. كبير الحرامية ولامم شملها.. كل الشياطين انت عمها.. ويقول أنا ابنها وابن بطنها!.. عامل برىء بيضحك على عقلها.. ذليت شبابها وشعبها.. كل الكروش انت صنعتها.. كفاية غش وعنطظة.. كفاية غباوة وغطرسة.. أس الفساد يا مدرسة.. كنست مصر بمكنسة.. ومصر غالية وعالية بمجدها.. حانموت ونعيش فى ظلها.. ألمنا وجروحنا هو جرحها.. أفعالك وظلمك عكرت صفوها.. ولا هى أمك ولا انت ابنها.. مخلوع من حضنها وقلبها.. ولا انت بطل ولا سبب نصرها.. بطولة وهمية زيفتها.. ولا حاجة انت عملتها.. غير الخيانة انت لها.. حبيت نفسك فأهنتها.. مصر الحضارة بحلوها ومرها.. دمك الفاسد مش دمها.. ابعد يا فاسد عن حلمها.. ليه تقول أنت لها.. ولا أنت لها ولا أنت زيها.. سنين قاعد علشان تذلها.. لأنك مش ابنها ولا ابن بطنها.
مدرس بمدرسة جنوب قنا
