نويت أرشح نفسى رئيس.. وأطمن قلوب قلقانة.. كلام بجد مش تهييس.. فاضى معنديش شغلانة!.. كنت حرامى فى أتوبيس.. أقلب حالى ع العصرية.. عندى فكرة عن التوريث.. وولدين ناقصين تربية!.. أعرف أدى كلام ووعود.. وعندى مهارة فى التهريب.. حواليه رجال أسود.. تعرف تخلى الشمس تغيب!.. جاهز أنا من مجاميعه.. حق الشعب أحطه فى كرشى.. دم أخويا سهل أبيعه.. المهم.. أفضل ع الكرسى!..
مات ضميرى مالحقش يعيش.. وأحلف عمرى ما صليت.. باخد دايماً عشان مديش.. وراجل قوى بس بره البيت!.. دمى تقيل وشكلى ماسخ.. قلبى ميت مفيهوش إحساس.. وإن كان ع الظلم جوايا راسخ.. لكن الأمل على طول ينداس!.. لو حد عملى أبو الرجال.. ونكش ورايا ف سكتى.. هيعيش حياته فى انعزال.. تلفيق التهم لعبتى!.. واكتب على مصر بلد الفساد.. فوق ترابها ورملها.. وجلب المصايب للعباد.. للى يفكر يروحلها!.. ولجل المحبة أسجن قتيل.. ومشيها ظرف طارئ.. واعمل شغل على تقيل.. بعقد قانون الطوارئ!.. معايا شورت وفانلة كط.. يومين واطلع على شرم.. آكل كفيار واتحلى ببط.. إن غضب الموج أفرمه فرم!.. شكل مراتى عملى أزمة.. بمكوة شعر وكام فستان.. على شنطة بنى وجوز جزمة.. ييجى منها وتبقى سوزان!..
أنا كده جاهز وع الفرازة.. والشعب فى حاله وأنا فى حالى.. أريح بالى وأعيش فى إجازة.. وإن شا الله تولع طب وأنا مالى!.. ناقص إيه وأبقى الريس.. شوية دولارات ع الماشى.. هاعمل حسابى أعبى وأكيس.. لبنوك برة متستناشى!.. مش أحسن من زويل والبرادعى وموسى.. جايين يقولوا هنطور ونبنى ونعلى.. أما أنا همشيها بالكوسة.. زى ما كنا ع الحال ده تملى!.. ولو حد قابلك ولا زارك.. وسألك عن الأسرة المالكة.. اسمى محمد كوتنى بنارك.. وشهرتى البقرة الضاحكة!.. وعنوانى سهل لحد الباب.. 30 شارع الظلم والعناد.. متفرع من اليأس سكة العذاب.. زنزانة 7 حارة الفساد!!.
